Sa prenda cuada est unu contu pro mannos e minores, ma prus che totu pro minores paris a sos mannos.
Sa prenda cuada est unu contu sardu, in limba sarda, chi cheret contare contos piticos pro nde contare de prus mannos, pro lòmpere, mancari in manera lèbia, a fàghere a connòschere s’istòria nostra a totus, ca a connòschere s’istòria de sa Sardigna est unu deretu.
Perdu – su protagonista de custu contu – cheret fàghere s’archeòlogo, comente s’ajaju e comente Giovanni Lilliu e issaras nois isperamus chi a totus, a sos babbos e a sas mammas, comente a sos pitzinneddos ddis bèngiat sa curiosidade de ischire ite est custu mestieri, chie fiat Lilliu e gasi ite est su Nuraxi de Barùmini o ite sunt sos gigantes de Montiprama.
Custu contu cheret iscurtadu cun atentzione prus che totu dae sos mannos pro ite diant a dèpere èssere issos a agiudare sos pitzinneddos a cumprèndere ite ddi at a segus de su contu, bogandende foras sas prendas cuadas in sos foeddos, bogandende foras sa morale, su sensu, su sinnificadu.
Cun custu traballu, frutu de s’amighèntzia intre totu sos professionistas chi ant collaboradu e de s’amore mannu pro sa limba sarda e sa terra nostra est dedicadu a sos pitzinneddos chi dd’ant a iscurtare, pro chi siat de profetu pro issos e fintzas pro sa limba matessi, pro chi tèngiant, paris, unu benidore e iscant sighire a bisare.
Ant a interbènnere:
Mara Durante (Universidade de Casteddu)
Marzia Varaldo (Cooperativa MIllepiedu ONLUS)
Tore Cubeddu (Terra de Punt)
Alessia Pirastu
Leturas Alessia Pirastu, Mùsicas Alessandro Pintus, Immagines Labor cinema.
Pro nde ischire de prus http://www.terradepunt.it/distribuzione/libri/723/
Nessun commento:
Posta un commento